🏠
#薛宅日常 聖誕篇
今次前設有些少長，希望大家俾啲耐性。
話說我不嬲屋企因為地區嘅緣故，
一直都係室內溫度低過室外溫度，
我亦都經常會着得太多衫出街，
Isa姐長期喺屋企都要着住件褸行嚟行去，
所以今個聖誕我買咗部冷暖風機送俾isa姐，
大概係兩部PG gundam嘅價錢。
聖誕節正日，朝頭早送到，
正當我喺度set up緊嘅時候，
isa姐一出廳，見到成個廳立立亂非常驚喜：
「我搵咗呢個嘢好耐㗎喇！」
我：「係呀，見屋企都有需要，所以買嚟當聖誕禮物。」
Isa:「多謝！不過要買㗎？」
（到底係咪真係當我所有嘢都有sponsor⋯⋯）
佢繼續喺度評論份聖誕禮物，我繼續低頭睇緊份說明書⋯⋯
媽：「哩個大細啱啱好！」
我：「唔算好大囉。」
媽：「冇logo個㗎喎，又幾簡潔。」
我：「依家大部份設計都係咁。」
媽：「又幾硬淨。」
我：「你本身覺得佢會好脆弱咩？」
媽：「用嚟放廢紙啱啱好。」
我：「咩呀⋯⋯」
我一回頭，原來佢嘅視線從來都冇接觸過部冷暖風機，佢一路都係講緊我拆咗出嚟，原本喺個箱入面填充位置頂住個風機嘅！紙！盒！即係圖中左邊呢一個！
我頂吖！我買咗成四千幾蚊，諗住終於有句好說話聽下，佢居然最鍾意係個紙盒！完全無視個本體！佢話因為個盒好方便，可以用嚟放廢物分類嘅紙類物品！頭先所講嗰啲「唔算好大、冇logo、幾硬淨」全部都係頌讚個紙盒！我想講我放喺屋企嘅心思，係白費囉！係完完全全嘅白費囉！
Search